Nan yon rapò Fon Nasyonzini pou timoun(UNICEF) bay nan semèn sa, li fè konnen gen ijans pou timoun Ayiti yo. Konsa nan chif yo bay yo, yo fè kwè se anviwon 3 milyon timoun k ap soufri grangou epi k ap mal manje nan moman an akòz vyolans maladi kolera, katastròf natirèl ki gen nan peyi a.
Selon òganis Onizyen an, 3 milyon timoun sa yo nan yon sitiyasyon kote yo bezwen yon èd imanitè, e daprè sa yo di yo potko janm rive anrejistre chif sa yo avan sa. Se sa k fè tou, Bruno Maes ki se youn nan reprezantan UNICEF nan peyi a te deklare pou di “timoun Ayiti yo ap pase yon move pas yo pa te janm konn fè fas ak yo nan tout listwa, kounya yo plis fè fas ak danje. Timoun sa yo pèdi lespwa yo bezwen pwoteksyon ak asistans”.
Pandan genyen nan yo grangou mete yo nan sitiyasyon difisil, gen anviwon 30 % lòt ki fè malnitrisyon ki ka koz yo mouri. Daprè rapò yo a, sou 4 timoun gen youn nan yo ki soufri malnitrisyon kwonik nan peyi a.
Mete sou kote vyolans gang yo, dezespwa, ak move lavi, òganis la fè konprann timoun yo viktim tou nan kesyon move tan peyi a ap konnen pandan sezon siklòn nan. Men malgre sa, responsab yo di malgre tout defi ekonomik yo kontre yo rive jwenn 15% nan 246 milyon dola y ap rasanble pou pote èd yo sou teritwa nou an.
Pandantan sa, ayè vandredi 16 jen an, Konsèy Ekonomik Sosyal Nasyonzini an te konvoke kèk òganis ameriken ki la pou bay èd yo tankou Òganizasyon Nasyonzini pou Alimantasyon ak Agrikilti (FAO), Pwogram Alimantè mondyal(PAM), nan yon reyinyon prese prese pou te diskite sou kòman yo ka reponn ak ijans imanitè ki genyen nan peyi Dayiti a, daprè Miami Herald.
“Gen yon sitiyasyon imanitè ki ijan. Se pou sa, nou vle eseye panche sou nesesite ki genyen pou Ayiti ta konble tèt li pou kont li nan zafè pwodiksyon alimantè. N ap wè ki mwayen ki genyen pou konstui chèn agrikòl la, jan pou n kreye yon fason pou n plante men tou, pou n transfòme epi mete sou pye yon endistri alimantè an Ayiti“, se deklarasyon reprezantan kanadyen nan ONU an, Bob Rae.
Atik sa se pwopriyete prive ©️ Gwoup Medya MAGHAITI 2023
