Jodi lendi 31 jiyè a Polis Nasyonal Dayiti prezante yon lis 6 moun yo arete madi 25 jiyè pase a nan Pòtoprens pou asosyasyon yo ak gang. Pami moun sa yo, genyen atis Kernizan Wilkinson, alias Bourik the Latalay.
Semèn ki sot pase a arestasyon atis Bourik The Latalay te fè anpil pale. Jodi a, PNH fè konnen atis la ta youn nan manb gang Vilaj de Dye, selon plent anpil moun nan popilasyon an te pote. “Selon enfòmasyon popilasyon an bay, nèg sa yo toujou ale nan Vilaj la epi yo se manb aktif gang lan”, nan sa PNH la ekri.
Enstitisyon polisyè a arete 6 endividi sa yo nan ang ri Magloire Ambroise ak Saint-Honoré. “Nan moman arestasyon an moun sa yo te dwe ale Vilaj de Dye pou yo te ka al fè videyo“, selon PNH la. 6 moun sa yo se Kernizan Wilkinson alyas Bourik, Fatal Guerson, Lestin Garlynsky, Juste Ismitchel, François Ricky Butervens ak Edmond Gesnelson Junior.
Tout moun sa yo te nan yon machin Honda CRV ki gen koulè ble epi ki pa gen plak dèyè. PNH la presize nan jou ki sot pase yo te gen anpil fèt nan Vilaj de Dye kote Izo ak Manno ap dirije. “Anpil lòt atis, pami yo anpil DJ te dwe ale nan aktivite sa yo”, selon kominike sa a.
Pandan tan sa a, endividi yo fèmen nan prizon pandan DCPJ ap travay sou dosye a. Enstitisyon an di li kenbe machin moun sa yo te ye a aprè yon jij pou lapè te verifye li.
Atik sa se pwopriyete prive ©️ Gwoup Medya MAGHAITI 2023
