Nan yon kominike òganizasyon entènasyonal «Displacement Tracking Matrix – DTM-OIM» mete deyò jounen jodi madi 02 avril 2024, yo fè konnen sa gen plis pase yon semèn depi bandi ak zam pa sispann teworize popilasyon an epi kontinye ogmante zak vyolans yo nan zòn Metwopolitèn nan. Zak vyolans sa yo ta pral lakoz 53125 moun kite kapital la pou sove lavi yo nan peryòd 8 pou rive 29 mas ki sot pase la.
Popilasyon sivil la oblije kouri kite kapital la pou yo al pran refij an pwovens, pandan yo pran risk pase nan plizyè teritwa ki sou kontwòl gang yo, presizeman nan depatman Grandans, Sid, Sidès ak Nip.
Selon dènyè chif yo, te gen plis pase 116000 moun ki te deplase ale nan depatman ki nan Gran Sid peyi a 3 mwa ki sot pase yo, 33000 moun te kite Pòtoprens nan entèval 8 ak 20 mas 2024 pou yo ale an pwovens.
«Pwovens k ap akeyi moun sa yo pa gen ase enfrastrikti ni kominote yo pa gen ase kay pou resevwa yo ni ase resous pou penmèt yo fè fas ak kantite moun k ap vin abite yo», Se sa a DTM-OIM fè konnen atravè kominike sa a.
Paralèman, 68% moun ki kite Pòtoprens te deja deplase ale jwenn fanmi yo an pwovens oswa ale refijye nan divès lekòl oswa ale refijye yo sou plizyè plas piblik. Alòske gen ladan yo ki gentan deplase pandan 3 oubyen 4 fwa deja akoz zak ensekirite a k ap vale teren.
Boutofen, divès gwoup gang ki fè pati “Viv Ansanm” lan pa sispann nan pratik simen laperèz ak latwoublay anndan sosyete a, yo piye, yo boule, yo vyole epi masakre moun sou pretèks y ap mennen yon swadizan revolisyon nan peyi a. Kote yo anpeche moun vwayaje nan Ayewopò entènasyonal Tousen Louvèti a.
Kredi foto: Voanouvel
Atik sa se pwopriyete prive ©️ Gwoup Medya MAGHAITI 2024
