Nan dènyè dokiman Enstiti Ayisyen Estatik Enfòmatik (IHSI) fè konnen, pou mwa fevriye a gen yon to enflasyon 23% nan peyi d Ayiti, endis jeneral pri konsomasyon yo (IPC) ogmante nan yon nivo 362.5 an janvye epi grandi nan nivo 373.6 an fevriye ki sot pase a, sa nou konsidere kòm yon akselerasyon 3.1% kont 1.1% baz mansyèl epi 23% kont 20.9% enflasyon nan entèval yon mwa.
Ogmantasyon pri jeneral sa touche tout kategori byen konsomasyon nan peyi a, sitou pwodui alimantè yo ak bwason ki gen alkòl ladan yo a, kote yo ogmante 4% nan yon mwa epi rive nan 31.9% nan sèlman 1 an. Pandan rad pou abiye ak soulye moun yo ogmante 2.7% nan yon mwa epi 17.6% nan 1 an. Depans ki gen pou wè avèk kay, dlo, gaz, elektrisite, elatriye ogmante 2.4% nan yon mwa epi 25.8% nan 1 an. Lè n pran mèb, atik menaje, depans chak jou moun ap fè nan fwaye yo, sa yo monte 2.3% nan yon mwa epi 18.2% nan sèlman 1 an. Anplis, sèvis nan restoran pou koze fonksyonman rive ogmante 3% nan yon mwa epi 17.3% sou 1 an.
Sitiyasyon ensekirite an ak blokaj divès wout ak Ayowopò epi pò nan peyi a lakoz ogmantasyon pri pwodui ak sèvis nan peyi a depi entèval yon mwa. Selon IHSI pri pwodui lokal yo ap konnen yon ogmantasyon 23.2% pandan kwasans li ane a, tandiske pwodui enpòte yo ap ogmante pi ba pase 22.9% nan peyi a.
Pou fini, enflasyon an, nan divès depatman nan peyi a tankou depatman Sid ak Grandans epi Nip gen yon ogmantasyon 24.8%, alòske pou depatman Sidès, Lwès presizeman zòn Metwopolitèn nan gen yon ogmantasyon 24.4% pou ane a. Pandan tan sa a , pou lòt rejyon nan peyi a, enflasyon an touche yo nan yon pousantaj 22%.
Atik sa se pwopriyete prive ©️ Gwoup Medya MAGHAITI 2024
