Sektè prive ayisyen an voye nan dat 15 avril ki sot pase a yon lèt bay prezidan Kenya a William Ruto, presizeman sektè Regwoupman Patwonal Ayisyen an (RAPH) ak Enstiti Makaya a pou di y ap tann sipò yo.
«Lè n chita sou fòmasyon nouvo gouvènman tranzisyon an ki ouvè ak tout sektè nan peyi a k ap gen pou pran fonksyon li nan jou k ap vini an, nou menm manm nan sektè a pare pou akeyi fòs Kenya yo nan yon ti tan kout», se sa yo fè konnen nan yon lèt yo adrese ak prezidan Kenya William Ruto.
Divès piyaj ak menas pa sispann fèt sou enstitisyon prive ak piblik an Ayiti a, sa ki lakoz anpil laperèz ak anpechman pou enstitisyon yo fonksyone kòmsadwa nan peyi a, alòske pou sektè prive a, se sèl sipò yon fòs miltinasyonal ki ka vin ede peyi a sòti nan sa li ye a.
«Nou menm nan sektè prive a ap tann deplwayman fòs miltinasyonal la pou nou ka rale yon souf ak ensekirite sa a», se sa sektè patwonal Ayisyen an ajoute.
Pandan tan sa a, divès gwoup nan konsèy prezidansyèl Tranzisyon an pa dakò ak yon entèvansyon militè, men pito yon sipò teknik ak Lapolis d Ayiti. Sa ki lakoz, yo bay CARICOM anpil repwòch akoz rekòmandasyon sa a pou pèmèt konsèy prezidansyèl Tranzisyon an kanpe.
Pou fini, sektè patwonal la konnen li regrèt pou reta y ap pran pou depwaye fòs miltinasyonal la. Li montre regrè l tou paske sa fè plis pase 6 mwa yo te adopte rezolisyon 2699 la, nan mwens 3 mwa anvan manda inisyal la, sa ki pral fè 9 mwa nan 2 jiyè k ap vini an la.
© Tous droits réservés – Groupe Média MAGHAITI 2024
