Nan òdonans jij Wilner Morin rann sou dosye koripsyon Inite Lit Kont Koripsyon (ULCC) te jwenn sou anpil fonksyonè leta, jodi madi 14 me 2024 la, li deside voye Romel Bell ak 2 lòt pèsonalite al jije devan tribinal kriminèl. Annatandan yo al reponn kesyon lajistis san asistans jiri, majistra Morin mande pou lapolis arete yo pou mete nan prizon.
Ansyen direktè Administrasyon Jeneral ladwàn (AGD) nan, Romel Bell ak madanm li, Anna Dorvil Bell, ansanm ak Pè Duckens Augustin se non 3 moun sa yo jij Morin mande pou al jije devan tribinal kriminèl san asistans jiri. Selon rapò jij la, moun sa yo ta gen men yo tranpe nan blanchiman lajan, finansman aktivite kriminèl, konplisite nan blanchi lajan, move deklarasyon patrimwàn, epi rann tèt yo rich nan fason ilegal san n pa bliye asosyasyon malfektè.
Se pou tèt sa a, depi kounye a majistra Wilner Morin mande pou lapolis arete epi mete nan prizon 3 moun sa yo, jiskaske yo al reponn kesyon yo dwe reponn yo. Pandan tan sa a, òdonans sa jij la bay depi 8 me 2024 la ta deja nan pakè Pòtoprens pou tout rès pwosesis yo.
N ap fè konnen, rezilta ankèt ULCC a te montre Romel Bell pa t fè deklarasyon patrimwàn pou divès byen tankou machin, kont bankè, antrepriz komèsyal, ak kay li te genyen lè l te antre an fonksyon an.
Anketè yo te presize, ansyen direktè AGD a pa t di li gen 5 machin ki anrejistre sou non l, 4 lòt sou non madanm li, Anna Dorvil Bell, yon estasyon Radyo yo rele “Génération de la ronde”. Yo di tou, li se gwo aksyonè nan sosyete anonim A&L DISTRIBUTION, madanm li posede 3 ponp gaz, alòske se sèlman youn li te deklare li genyen.
Atik sa se pwopriyete prive © Gwoup Medya MAGHAITI 2024
