Aprè yo te fin prete sèman nan palè a jodi jedi 25 avril la, reprezantan Konsèy Prezidansyèl la, Régine Abraham, nan diskou l fè, bay 5 aksyon y ap gen pou yo poze nan peyi a. Retabli lapè nan peyi a ak òganize eleksyon se pami misyon manm konsèy yo bay tèt yo pou yo akonpli.
Retabli sekirite piblik, òganize konferans nasyonal ak refòm konstitisyonèl, fè eleksyon, bay lajistis manm ak redrese enstitisyon epi sistèm ekonomik peyi a, se sa yo reprezantan an bay kòm ajannda yo ta dwe suiv pandan yo pran tèt peyi a. Nan diskou li a, madanm nan kondane zak vyolans ki gen nan peyi a ki pèmèt sitiyasyon a plis dejenere kounye a.
«Jodi a make premye jou travay nesesè pou tabli lòd, disiplin, lapè epi kondisyon favorab pou kreyasyon richès nan peyi nou an ki fin tonbe a», se deklarasyon sa a sèl grenn fanm konsèy prezidansyèl la nan 2èm etap enstalasyon Konsèy la nan lokal laprimati a. Pandan sa a, li rete kwè tou aksyon sa a se kòmansman nan mete men ansanm ki dwe fèt pou Repiblik la ki vize ofri tout pitit peyi d Ayiti yo yon lavi miyò.
Pou fini, Régine Abraham remèsye Kominote Karayib la (CARICOM), Etazini, Kanada ak Lafrans ki te fè demach pou rive bout ak konsèy sa a, li pa bliye remèsye tout jefò fòs lòd yo tou. Li konseye pou tout moun mete yo ansanm pou kapab kòmanse travay ansanm depi kounye a.
Atik sa se pwopriyete prive ©️ Gwoup Medya MAGHAITI 2024
