Dominique Dupuy ki se reprezantan kowalisyon Rezistans Demokratik ak Angajman Devlopman/ Konpwomi (RED/EDE/ COMPROMIS) retire kò l nan konsèy prezidansyèl 7 manm lan. Sa ki lakòz sa a se pawòl diskriminatwa sou laj li, menas sou lavi l epi pawòl san fondman kont li jounen jodi dimanch 24 mas la. Li bay kòz yo atravè yon videyo li pibliye sou Rezo Sosyal yo.
«Anplis atak san fondman sou karaktè m, menas sou lavi m antanke sèl grenn fanm ki te deside patisipe pami 8 gason. M fè fas avèk obstak kèk aktè te vle kreye tankou aplike pwovizyon sou laj ki egziste nan konstitisyon 1987 la», se sa a ansyen reprezantan fanm nan konsèy prezidansyèl Tranzisyon an fè konnen.
Dominique Dupuy ki se ansyen anbasadè ak delege nan UNESCO, ki te fè pati Konsèy prezidansyèl Tranzisyon (KPT) nan Kominote Karayib (CARICOM) ak patnè li yo, retire kò li pou divès pawòl li t ap resevwa.
«Mwen te resevwa yon apèl kote yo te envite m pou m vin pote kole nan solisyon ki t ap negosye pou peyi a, nouvèl sa ki te fè wonn peyi a», se sa a Dominique Dupuy ajoute.
Alòske ansyen delege Òganizasyon Nasyonzini pou Edikasyon ak lasyans epi Kilti (UNESCO) ki se Dominique Dupuy, te ranplase ansyen minis Marie Ghislaine nan gwoupman politik (RED/EDE/Compromis) anndan konsèy prezidansyèl sa a.
«M ap remèsye platfòm EDE/ RED/ Konpwomi Istorik ki te wè nan Mwen mwen kòm aktè ki te ka itil peyi alòske m pa yon manm nan okenn pati sa yo», pou avanse ansyen anbasadè Dominique Dupuy.
Pandanstan, n ap fè konnen youn nan obsèvatè ki se René Jean Jumeau, mande pou li vote nan chwa prezidan konsèy la ak minis lan osnon l ap retire kò l si tout fwa li pa kapab vote.
© Tous droits réservés – Groupe Média MAGHAITI 2024
