Nan yon twit li fè jodi vandredi 16 jen an, Minis Afè Etranje nan peyi Repiblik Dominikèn di Kanada pa gen otorizasyon gouvènman dominiken an pou enstale yon biwo ki pou ede Polis Nasyonal Dayiti a jan sa t ap pale nan Laprès.
«Gouvènman Dominiken an konfime li pa te diskite oubyen aksepte okenn otorizasyon pou enstale sou teritwa lakay li an yon Biwo kowòdinasyon pou soutni Polis Nasyonal Dayiti, selon enfòmasyon jounal Kanada te fè konnen an», daprè twit Minis Afè Etranje, Robert Álvarez.
Alòske gouvènman Kanadyen te fè konnen ayè jedi 15 jen an atravè «Radio-Canada», gen yon antrepriz kominikasyon ki finanse gras avèk kontribisyon leta epi menm endike «Gouvènman kanadyen pral gen pou li ouvri yon biwo nan peyi Repiblik Dominikèn, ki pral gen pou manda reponn avèk bezwen Polis Nasyonal Dayiti (PNH). Kote se sèl fòs polis la k ap gen pou entèvni pou retabli lapè nan peyi a», selon sa medya Diario Libre rapòte sou dosye sa.
Sou lòtbò a, Ministè afè etranje Kanada te fè konnen : «Repiblik Dominikèn te prezan nan reyinyon ministeryèl avèk plizyè patnè konsène sou sitiyasyon sekirite an Ayiti, kote yo te diskite epi te deside mete yon biwo lakay yo pou reponn avèk bezwen Polis Nasyonal Dayiti ki touprè yo a», nan sa Diario Libre rapòte.
Atik sa se pwopriyete prive ©️ Gwoup Medya MAGHAITI 2023
