Nan yon kominike Rektora Inivèsite Leta Ayisyen an te mete deyò ayè Lendi 17 avril 2023 a, li fè konnen li kanpe tout relasyon li te gen avèk Lekòl Dwa ak Syans Ekonomik Okay (EDSEC). Kidonk dirijan nan lekòl sa pa gen dwa pou li itilize non ak logo inivèsite Leta Dayiti (UEH) a.
Rektora ILA di li pare pou li sanksyone yo apati lalwa si responsab EDSEC yo refize obeyi avèk desizyon sa.
«Lè nou konsidere sitiyasyon ki pa nòmal nan EDSEC nan nivo akademik ak administratif, lè nou konsidere jefò Rektora pou li redrese sa, lè nou konsidere lèt konsèy egzekitif avèk dirijan EDSEC nan dat 25 janvye 2023 ak 3 avril 2023, kote mesaj la te klè avèk yo nan rankont 3 mas dènyè a, lè nous konsidere rezistans parapò avèk refòm Rektora a pwopoze yo a, elatriye», se rezon sa yo ki ta fè Rektora Inivèsite Leta Ayisyen an entèdi responsab EDSEC yo itilize non ak logo inivèsite Leta a.
Sou lòtbò a Rektora di li pare pou li tande tout dòleyans byen fòmile nan kominote a, nan sousi pou li ka chita sou enterè fakilte yo, nan bon jan respè nòm ak prensip akademik ki pi ba yo.
«Nou konsyan lekòl Dwa ak Ekonomik Okay la, se yon patrimwann pou moun Okay ak pou depatman Sid lan», nan sa Rektora a di.
Atik sa se pwopriyete prive ©️ Gwoup Medya MAGHAITI 2023
