Plizyè komèsan dominiken pran lari jodi lendi 30 oktòb 2023 a nan lide pou manifeste kont gouvènman an ki te pran plizyè mezi kont peyi Dayiti, akòz konstriksyon kanal la nan Wanament. Selon Listín Diario, te vinn gen gwo goumen nan mobilizasyon sa a ant ajan kò espesyalize sekirite fwontyè terès yo (Cesfront) ak komèsan sa yo nan mache fwontalye Dajabón nan.
Aprè yo te finn bay gouvènman Abinader la yon semèn kòm tan pou te repanse sou mezi l te pran yo ki afekte echanj komèsyal dominiken yo, e lè yo konstate anyen pa fèt jouskaprezan, divès komèsan dominiken t al manifeste nan mache fwontalye Dajabón nan jodi a. Poutan, se yon dezisyon ajan Cesfront yo pa t dakò sou li, puiske yo te tante anpeche komèsan yo antre nan mache a.
Konsa, plizyè lòt jounal dominiken pami yo Telenoticias fè konnen te gen gwo goumen ant ajan yo ak komèsan yo, jouskaske machann yo te vinn fòse louvri pòt mache a pou yo antre. Se menm jan an tou, plizyè videyo montre tout bon vre kòman komèsan yo te refize obeyi ak lòd ajan Cesfront yo.
Retire tant Depatman Nasyonal Ankèt yo(DNI) enstale nan mache a ki pou pran enfòmasyon byometrik Ayisyen yo ni sa ki nan antre fwontyè a, diminye nan mezi ki te pran yo, se pami divès revandikasyon komèsan sa yo genyen.
Atik sa se pwopriyete prive ©️ Gwoup Medya MAGHAITI 2023
