Radyo Televizyon Karayib (RTVC) deside kite riyèl Chavann jounen jodi madi 12 mas 2024 la, akòz nivo ensekirite k ap vale teren nan peyi a depi kèk jou. Se yon desizyon pou yon ti tan ki pran aprè nèg ak zam pa sispann mete laperèz nan Pòtoprens presizeman nan blòk Kafoufèy la, selon Radio Métronome.
“Se yon desizyon nou pran pwovizwaman akòz ensekirite ki debòde nan blòk la annatandan sitiyasyon an retounen nan nòmal li“, selon deklarasyon direktè Patrick Moussignac.
Radyo ak Televizyon Karayib(RTVC) retire kò li nan blòk la, lè n raple espas la te resevwa plizyè bal mawon nan baryè prensipal li ak nan vit li epi kote ki gen plizyè lòt radyo ki te touche tou tankou espace FM ak Sky FM. Yon sitiyasyon ki mete lavi pèsonèl li yo andanje.
Pandan menm moman ensekirite a, yon jèn atis yo te konnen sou non “Degoutan Zoe Blood” ki te vrèman popilè nan zòn nan, ki te konn fè tatou te pral tonbe anba bal pandan li t ap eseye retire machin li nan dat 9 mas ki sot pase la.
An reyalite, plizyè sitwayen ak mèt biznis yo oblije fèmen pòt yo toujou akòz nivo banditis ak zak vyolans k ap pèsiste nan zòn nan. N ap raple sou Komisarya Mache Salomon an ki touprè a te pral boule ak sakaje depi lannuit mèkredi 6 mas la kote bandi 5 segond ak gran ravin te pran kontwòl li .
Atik sa se pwopriyete prive ©️ Gwoup Medya MAGHAITI 2024
