Kontrèman avèk 20 Eta Repibliken yo ki te vle pou jij nan tribinal Tekzas yo rive kanpe pwogram imanitè administrasyon Biden lan, ayè madi 28 fevriye a, jij Drew Tipton deside kite pwogram lan kontinye mache, selon Univision.
Desizyon jij Drew Tipton pran ayè madi a, konsène plent 20 eta repibliken yo te depoze kont gouvènman Biden lan, nan mwa fevriye a kote yo t ap mande pou jij ki sou dosye a kanpe pwogram lan san pèdi tan. Yon inisyativ ki selon yo menm vyole lalwa imigrasyon Etazini.
Pandanstan, nan dat 3 mas k ap vini la, ap gen yon premye odyans nan tribinal Teksas la, kote tout desizyon final yo ap gen pou bay aprè lòt seyans ki ta dwe genyen. Nan sans sa, avoka gouvènman Ameriken an ak tout avoka 20 eta repibliken yo ap gen pou yo fas pou fas pou kore pozisyon yo.
Paralèlman, malgre tout kritik eta sa yo pote kont nouvo plan immigrasyon sila a, gen 36 500 migran nan 4 peyi benefisyè yo ki gentan jwenn otorizasyon vwayaj yo sou 60 400 moun, daprè Depatman sekirite enteryè Etazini an (DHS).
Nan sa ki konsène chif migran Ayisyen yo, sou 36 500 migran ki jwenn otorizasyon pa yo a, gen 11300 ladan yo Depatman sekirite enteryè Etazini an idantifye kòm sitwayen ayisyen. Men pami tout Ayisyen sa yo, se sèlman 5 500 ki deja rive Etazini, selon Immigrant Familly Services Institut-USA(IFSI).
Atik sa se pwopriyete prive ©️ Gwoup Medya MAGHAITI 2023
