Pwodiktè dominiken yo anonse nan lannuit mèkredi 27 septanm 2023 a, yo pral itilize ze ki pouri nan men yo pandan kriz ayisyano-dominiken an pou pwoteste kont gouvènman yo a 2 oktòb k ap vini la. Yo pran desizyon sila se nan kad pou montre gouvènman an nan ki nivo desizyon fèmen fwontyè a afekte yo nan pèdi machandiz, selon Listín Diario.
Depi aprè fwontyè ayisyano-dominiken yo fèmen an, sektè agrikòl dominiken an pa sispann plenyen dèske y ap pèdi lajan ak machandiz. Se pou sa, jou k ap lendi 2 oktòb k ap vini la Ti pwodiktè ak gwo pwodiktè ki sòti nan lokalite La Vega ak Espaillat fè konnen yo pral depoze plizyè milye ze pouri douvan moniman peyizan yo nan zòn Moca.
Yon kote, prezidan asosiyasyon nasyonal pwodiktè ze yo(Asohuevos), Manuel Escano eksprime enkyetid li pou pwodiktè yo paske li estime sou sèlman kèk dizèn moun nan sektè sila se plizyè milye ze ki pèdi. E li di se paske moun sa yo se sou kont mache binasyonal la yo viv .
Selon detay ki bay yo, sou 226 milyon ze Repiblik Dominiken pwodui chak mwa gen 40 milyon ladan yo ki fèt espesyalman pou al vann ak ayisyen nan mache fwontalye a. Poutan, sou kèk semèn fwontyè terès la fèmen an la pwodiktè dominiken yo deklare yo sou wout pou pèdi 497 milyon peso pa mwa.
Yon lòt kote, pandan mouvman pwotestasyon yo pare pou al fè nan lokalite Moca a, tout pwodiktè yo deside pou bay moun k ap vinn patisipe ak yo a plizyè milye ze. Yon desizyon yo pran toujou nan kad pou evite plis ze rete pouri nan depo yo.
Atik sa se pwopriyete prive ©️ Gwoup Medya MAGHAITI 2023
