Nan okazyon selebrasyon 2 lane egzistans Rasanbleman Nasyonal Madan Sara ak Peyizan yo (RANAMSAP), prezidan estrikti sa ki se Mélita Pierre denonse ayè jedi 30 mas la, gouvènman an ki selon li menm, pa etabli okenn plan pou ede Madan Sara yo ni jere kesyon sekirite yo.
Nan pawòl responsab la t ap di yo, li fè konprann malgre Madan Sara yo viktim tout fasèt vyolans ki genyen nan peyi a, epi yo te deside siyen akò 21 desanm 22 a, pyès moun nan gouvènman an pa voye je gade yo. Kidnapin, vyòl, tonbe anba bal prezime bandi, grangou, pa jwenn mwayen pou sikile lib, se kèk nan sa l te site y ap andire nan kat kwen peyi a. Nan sans sa, li pwofite voye yon mesaj klè pou Premye minis Ariel Henry ak tout akolit li yo.
“Nou vle pale ak nimewo 1 peyi a paske nou menm RANAMSAP nou te antre nan yon demach ki t ap fèt 21 desanm pou n te ka wè si pa t ap gen yon chanjman nan peyi a pou tout madan Sara yo paske se yo k gen poumon ekonomi peyi nan men yo, men m pa wè anyen, nou ap kouri sou 3 mwa poko janm gen anyen ki di pou machann yo. Nou ta renmen kisa k ap fèt nan jou k ap vini yo“, se deklarasyon prezidan estrikti ti machann yo fè nan sikonstans lan.
Yon lòt bò, fas ak tout kesyon li t ap poze konsènan ki plan chanjman mèt akò 21 desanm lan ak tout akò 11 septanm nan genyen toutbon li rive di yo bouke, ak akò sa yo ki pa rive pote anyen serye pou yo, paske daprè li menm se zafè pèsonèl k ap regle.
“Mwen menm antanke prezidan RANAMSAP a m ap suiv, mwen anndan an m ap gad yon seri bagay menm wè se pa enterè popilasyon an vrèman. Tout moun ap jere enterè pa yo, men se pa peyi, men jounen jodi a nou bouke, nou pa kapab ankò“, toujou daprè Mélita.
Nan sa ki konsène bilan 2 lane egzistans estrikti a, nan kad fòmasyon pou jere lajan yo fè deja sou 15 mil moun yo genyen gen plis pase 800 ti machann ki pase nan etap fòmasyon an. Pandan tan sa, yo anonse gen nouvo mezi y ap travay sou yo tankou: asire transpò machann yo fèt nan sekirite pou yo pa anpile menm kote ak machandiz yo, mete kanpe yon sendika pou defann dwa Madan Sara yo, yo anonse tou yo sou wout pou sere koud yo ak(Ajans Amariken pou Devlopman Entènasyonal) USAID.
Photo: Le National
Atik sa se pwopriyete prive ©️ Gwoup Medya MAGHAITI 2023
