Prezidan kolobyen an, Gustavo Petro ki te vize vin Ayiti ak yon gwo delegasyon pap ka vini ankò. Daprè sa jounal Miami Herald di nan yon atik, anilasyon sa vini akoz kondisyon sekirite peyi a ki pa bon. Men, prezidan an ap toujou asiste ak envestiti prezidan dominiken an, Luis Abidaner jou k ap vandredi 16 dawout k ap vini la.
Daprè jounal ameriken an, ki site 2 sous, gouvènman tranzisyon an te ekri yon lèt ak chèf la madi 13 dawout pase a. Nan lèt sa a otorite ayisyen yo te avèti l nan ki kondisyon sekirite peyi a ye, e se sa ki fè tou vizit sa vin enposib pou l ta fèt.
Nan vizit sa, pezidan kolobyen an ak manm nan delegasyon l lan t ap pwofite rann vizit ak 17 ansyen sòlda kolobyen ki nan prizon poutèt yo te patisipe nan ansasinay ansyen Prezidan Jovenel Moïse.
Yon lòt kote, Miami Herald fè kwè vizit sa t ap gen ladan l tou kèk demach ak presyon diplomatik pou fè lajistis ayisyèn remèt ansyen sòlda Kolonbyen yo bay Kolonbi.
Yo ale pi lwen pou fè konprann mwa pase a, Kolonbi te ekri fòmèlman gouvènman ayisyen an. Kote yo te mande pou yo transfere mesye yo sou gad yo, se yon demann otorite ayisyen yo te refize, paske daprè yo se Ayiti menm pou akize sa yo jije pou krim nan.
sa se pwopriyete prive ©️ Gwoup Medya MAGHAITI 2024
