Jodi dimanch 18 septanm 2022 a, premye minis defakto Aryel Henry fè yon adrès ak nasyon epi mande pou lapè retabli aprè semenn mobilizasyon ki sot pase la parapò ak monte pri gaz la. Selon li, prezans chèf gang yo nan manifestasyon yo, kote te gen anpil dechoukay se rezon ki fè li di se pa zafè pwoblèm gaz ki t ap regle nan lari yo.
Premye minis defakto Aryel Henry di :” Peyi a vrèman pèdi anpil bagay pandan dènyè jou sa yo”.
Toujou nan menm adrès ak nasyon sa, chèf gouvènman vrèman ap karese popilasyon an, kote li pwomèt yo lajan sa l ap pran sou gaz yo pral penmèt li vini avèk divès pwogram sosyal pou sila ki pòv yo, achte anpil semans ak angrè, repare plizyè kanal dlo pou plante epi ogmante plizyè restoran kominotè pou ka fasilite anpil plat manje ak sila ki nan bezwen yo.
Pou li kontinye avanse, chèf primati a mande : ” Popilasyon an dwe patisipe ak debleye wout yo pandan y ap veye sou lòt moun ki vle mete barikad ak dife sou twotwa yo. Puiske gen anpil malad ki bezwen swen Lopital, anplis gen divès komèsan ki vle retounen nan okipasyon yo “.
Paralèlman, chèf gouvènman an enfòme gaz la deja disponib an kantite nan tèminal yo nan lide pou li distribye nan estasyon ponp yo. Kidonk, nou dwe rejwenn lapè nou pou machin sitenn yo kapab distribye gaz yo nan ponp yo avèk popilasyon an.
Diplis, premye minis defakto Aryel Henry benefisye jounen jodia sipò 2 manm nan peyi Etazini, youn ki mande yon Akò avèk tout moun epi lòt la sou bò pa li nan òganizasyon Nasyonzini (ONU), di : ” Mouvman pwotestasyon kont koze gaz nan lari a se inisyativ chèf gang yo”.
Atik sa se pwopriyete prive ©️ Gwoup Medya MAGHAITI 2022
