Jounen jodia lendi 6 fevriye 2023 a, gouvènman defakto an chwazi mete kanpe nouvo Wo Konsèy Tranzisyon (HTC) ki gen reprezantan 3 sektè ladan li : Mirlande Hyppolite Manigat (Politik), Laurent St. Cyr epi Calixte Fleuridor.
Wo konsèy Tranzisyon an te fòme nan dat 21 desanm 2022, nan lide pou l vin mete kanpe yon konsèy elektoral, kontribye nan yon sòti kriz anndan peyi an epi rankontre divès sektè Nasyonal.
«Nou pral gen pou n travay sou 5 gwo chantye: tabli sekirite epi kwape bandi; kontinye refòm ekonomik yo, anplis pase men nan konstitisyon an; fè bon eleksyon san moun pa, san fòs kote; remet pouvwa a bay moun ki eli» deklarasyon premye minis defakto Ariel Henry.
Pouvwa anplas la bay garanti li pral mete disponib tout mwayen ki nesesè pou yo akonpli misyon yo.
Selon militan politik Mirlande Hyppolite Manigat «Depi lè yo te rele m vin okipe gwo fonksyon sa, m pa sispann panse avèk valè fanmi m te aprann mwen, sitou lanmou pou patri a, tradisyon nou yo, atachman, onètete epi sivis.»
Gouvènman Ariel Henry kontinye pou li remèsye Sila sa yo ki mete yo disponib pou yo vin okipe Wo Konsèy Tranzisyon anndan peyi a, nan lide pou yo vin òganize eleksyon transparan epi pote kole nan yon konsansis anndan peyi an.
Militan politik la, Mirlande Manigat te kontinye pou li ajoute : «Konsansis 21 desanm se yon estrikti ideyal pou sòti kriz sa k ap pèdi tann anndan sosyete a, menmsi lis lan long epi petèt san bout. Men, pa gen okenn zèv moun ki pafè, kidonk konsansis sa nou mèt akòde li kredi epi bay li benefis dout pou rezilta l ap pote.»
Paralèlman, plizyè sitwayen nan peyi an pa te sispann mobilize kont enstalasyon sila yo k ap vin okipe Wo Konsèy Tranzisyon an, kòmkwa se pa okenn dezisyon ki pran nan non yo.
Poutan chèf Primati an te kontinye pou li di :« Depi jou m te pran fonksyon an, m te angaje m avèk nasyon an epi pran baton pèleren m pou m al rankontre divès sektè Nasyonal nan lide pou Yon konsansis sifizan anndan peyi a.»
Atik sa se pwopriyete prive ©️ Gwoup Medya MAGHAITI 2023
