Nan yon konferans pou laprès premye minis defakto Ariel Henry bay nan mèkredi 20 Jiyè 2022 nan Direksyon Jeneral Polis Nasyonal la, pou make yon lane depi li pran tèt pouvwa a, Premye minis Ariel Henry te pwononse li sou divès pwoblèm k ap travèse Lapolis la.
Ariel Henry, premye minis defakto di devan mikwo laprès : “Se avèk anpil plezi jodia m twouve m isit lan avèk reprezantan Polis Nasyonal Dayiti a pou make yon lane depi m pran fonksyon an kòm chèf. Nou tout konnen nan ki sikonstans trajik ak penib epi dramatik m rive nan tèt peyi a, sitou aprè dat lanmò trajik prezidan Jovenel Moïse la, mwen jwenn yon polis demoralize k ap mande eske li ka ede peyi a”.
Ariel Henry, kontinye pou li ajoute nan menm konferans sa : “Mwen konprann Lapolis ap fè fas ak plis pwoblèm òganizasyon olye mwayen, gouvènman mwen an pran mezi ak sitiyasyon an epi angaje ak divès refòm nesesè, kidonk m salye Direktè Lapolis la nan yon ti tan kout ak yon ti kras mwayen rive bay konfyans ak polisye nou yo”.
Toujou nan konferans pou laprès sa, premye minis lan te deklare: “Nou mize nan wout, se pa paske nou vle men se paske n rankontre anpil obstak, men nou kòmanse pase sou yo, mwen rete kwè n ap ka pote bon nouvèl“.
N ap raple premye minis defakto Ariel Henry, te pwomèt l ap retabli sekirite ak lapè nan lari yo nan dat 18 me 2022, malgre anpil fwa li envoke se akoz pwoblèm ensekirite ki fè eleksyon poko ka reyalize nan tèt peyi a. Pandanstan, li kontinye kwè se nan dyalòg ak tèt kole plizyè gwoup politik n ap sòti nan sa nou ye a.
Atik sa se pwopriyete prive ©️ Gwoup Medya MAGHAITI 2022
