Pòt pawòl lapolis nan Nò a, Arold Jean fè konnen jodi vandredi 9 dawout 2024 la yo rive arete 264 endividi nan depatman Nò peyi a. Daprè sa l fè konprann bilan sa fèt aprè divès operasyon lapolis te mennen pou mwa jiyè 2024 la.
“Se yon total 264 sispèk ki jwenn arestasyon yo nan kad operasyon sa yo PNH la tanmen pandan mwa jiyè ki sot pase a“, daprè enfòmasyon pòt pawòl la kominike.
Pami endividi sa yo, yo eksplike gen 119 yo arete pandan yo t ap poze zak malonèt, 145 lòt arete sou manda. Genyen tou 18 nan moun sa yo ki jwenn arestasyon yo pou vòlè ak asosiyasyon malfektè.
Pi lwen, responsab la rapòte gen 15 moun yo arete pou atak, youn pou kadejak. 10 pou magouy epi yon lòt jwenn arestasyon l pou vòlè machin.
Anplis, pòt pawòl lapolis nan Nò peyi a fè konnen genyen 14 endividi ki arete pou zak ansasinay ak tantativ ansasinay epi 11 lòt ki arete paske yo t ap twouble lapè piblik.
Pou sa ki gade materyèl yo sezi yo, enspektè polis la fè kwè PNH la sezi 3 zam ki se yon 9 milimèt ak 2 zam kreyòl.
Pandantan sa, nan divès operasyon fòs lòd yo mennen nan Chada, yo konfime chèf gang Jakson te rive pèdi lavi l nan moman l te nan afwontman ak Lapolis. Selon presizyon Arold Jean, bandi sa te bay anpil pwoblèm.
N ap raple, nan kòmansman mwa dawout la, Direktè PNH la, Normil Rameau te fè kwè 104 bandi te rive pèdi lavi yo nan depatman Lwès ak Latibonit pandan peryòd eta ijans lan.
Atik sa se pwopriyete prive ©️ Gwoup Medya MAGHAITI 2024
