Ansyen senatè Dieupie Chérubin pwofite jounen jodi mèkredi 17 avril 2024 la pou li pote yon eksplikasyon sou ki modèl opozisyon nou ta dwe gen nan peyi a. Pou li, sa n gen la a se pa yon opozisyon syantifik ni wè nan enterè peyi, men pito enterè mesken yo.
«Jovenel Moïse pa t ap ka fè eleksyon paske nan dènyè lè yo nou te gen yon ekip opozisyon ki pa t syantifik, yon bagay menm m te aprann lè m te sot nan peyi Bèljik nan kad vwayaj pou palman an». selon ansyen senatè Dieupie chérubin ki te montre aklè ki modèl opozisyon nou genyen nan peyi a, sou jounal Radyo ak Televizyon Karayib.
Ansyen senatè depatman Sidès la, Dieupie chérubin, fè kwè yon opozisyon dwe ede peyi a avanse, fòk li la pou l fè bon pwopozisyon. Si tout fwa gouvènman an ta pran pwopozisyon an, fòk li ta bay li kredi a, pou avanse nan Radyo ak Televizyon Karayib nan kad entèvyou sa a.
Dieupie Chérubin se pastè legliz Batis Ozana, ansyen senatè nan depatman Sidès sou banyè Pati Konvansyon Inite Demokratik (KID) ki te rantre an fonksyon nan lane 2015, kèk tan aprè ki ta pral rejwenn rejim PHTK a.
«Depi w wè yon opozisyon, se boule l ap boule, kraze l ap kraze, ale mande kisa k ap pase? Paske vrè opozisyon an l ap pran tan pou l tande gouvènman an, si gouvènman an vle fè yon bagay ki nan enterè pèp la, l ap aplodi e si l pa fè li tou. Rapid vit l ap kalkile youn pou li pwopoze», se sa ansyen palmantè Sidès la fè konnen.
N ap raple ansyen senatè a, pastè Dieupie chérubin, se moun ki toujou vle fè respekte lalwa ak lajistis nan peyi li. Li menm kwè nan yon lòt sosyete ak opozisyon syantifik anndan peyi a, pandan tan sa yo t apral arete l ak tout machin palman an nan dat 19 novanm 2020 puiske aprè manda l li patko remèt machin leta Santral te ba li pou l fonksyone a.
«Se pou opozisyon an fè bon pwopozisyon nan tout domèn, si gouvènman an pa aplike li. Lè l pran pouvwa a l ap ka vin fè yobpaske pèp pa nan Kiyès ki prezidan, men se kiyès k ap vin ba li sa li bezwen yo», se kon sa a ansyen senatè Dieupie chérubin fini entèvyou a sou Radyo ak Televizyon Karayib la.
© Tous droits réservés – Groupe Média MAGHAITI 2024
