Nan yon entèvyou sou radyo Magik 9 jodi vandredi 17 fevriye 2023 a, Yvens Désir ki se pòt pawòl komite k ap òganize kanaval la te pale sou koze bidjè ki disponib lan. Responsab la te tou pwofite site kèk gwoup ak atis k ap sou pakou a sòti 19 pou rive 21 fevriye k ap vini la.
Kanaval la ane sa nan Pòtoprens ap fèt sou tèm “Rekonsilyasyon pou lapè“. Komite a ki gen nan tèt li Yvens Désir, gentan resevwa nan lajan ki te prevwa pou òganize kanaval la.
«Bidjè ki prevwa pou Kanaval la li evalye a 121 milyon goud pou reyisi li an gwo, men Ministè Kilti ak Kominikasyon gentan bay annatandan 15 milyon goud», selon Yvens Désir sou radyo Magik 9.
Kanaval la ap gen pou fèt 19, 20,21 fevriye sòti 10è nan maten pou rive 6è nan aswè. Desizyon sa te rive pran akoz sitiyasyon ensekirite k ap ravaje peyi a epi Blakawout k ap taye banda sa ki ap penmèt plis timoun ka patisipe ladan li.
Pòt pawòl komite k ap òganize kanaval la fè konnen genyen plizyè gwoup ak atis solo k ap patisipe nan kanaval la pami yo Kreyòl la, Tony Mix, Ti Pay, Izolan, Junior Bonheur, elatriye. Yvens Désir di gen anpil slogan ki pare.
«Pale avèk mwen, fòk nou chita ansanm epi fòk nou antann nou puiske nou souvan chita ansanm pou lòt bagay, men nou pa janm antann n pou sove peyi a», selon konsène a.
Pòt pawòl komite Kanaval Pòtoprens lan, Yvens Désir te pwofite pale de pakou evènman an. « Se pral sòti Mozole, pase ri kazenn, ri sentonore epi al fini Pòtay Leyogann.» Li tou fè konnen gen defile k ap fèt avèk chofè moto, Lapolis, anbilans nan anviwon 10è tapan epi akonpanye 15 band ak pye.
Anpil polisye gentan ap prepare yo pou y al siveye Kanaval Pòtoprens ak lòt kote ankò nan peyi an, toujou selon Yvens Désir. « N ap gen 7 sekans, tankou Sekirite, Imigrasyon, Anviwonman, Retwospeksyon sou listwa nou, elatriye. Y ap sòti atravè timoun nan katye popilè yo, yo pral an total 2500 timoun k ap gen pou pote mesaj sa pou atizan yo.»
Atik sa se pwopriyete prive ©️ Gwoup Medya MAGHAITI 2023
