Plizyè milye moun te debake ayè dimanch 8 oktòb 2023 a nan zòn fwontyè ayisyen an pou te fèmen pòt la menm jan Repiblik Dominiken te fè l 15 septanm pase a. Aprè lapolis te anpeche yo fè sa, moun yo deklare nenpòt jan sa ye a y ap fèmen fwontyè a pou kenbe otorite peyi Dayiti.
Alòske nan peyi vwazen an plizyè sitwayen dominiken te tanmen ayè dimanch la, yon jounen manifestasyon pou te mande gouvènman dominiken an pou kenbe desizyon pou fwontyè ayisyano-dominiken yo toujou ret fèmen, popilasyon nan Wanament la yo menm tou te pran lari men se te pou te al fèmen fwontyè a nan bò Ayiti a.
Aksyon sa yo rive fèt nan 2 peyi yo se paske enfòmasyon yo ta fè kwè Prezidan Luis Abinader gen entansyon louvri fwontyè a nan bò pa yo a jodi lendi 9 oktòb la. Kòm repons abitan yo te vini ak materyèl pou te fèmen pòt la nèt, yon bagay polisye yo pa t kite yo fè.
“Yo fèmen n ap fèmen tou epa sèl yo ki gen dwa, nou gen dwa pou nou defann peyi nou se ansanm nou fò li ye nou pap okipe pyès moun. Polisye yo ap ba nou gaz, ap ba nou kou pou pouse nou, nou menm se dwa nou n ap defann paske se Ayisyen nou ye. N ap fèmen“, daprè sa youn nan abitan Wanament yo fè konnen.
Yon lòt kote, fas ak tansyon ki te genyen pou lapolis te anpeche moun yo fèmen fwontyè a ak blòk oubyen soude pòt la, diskisyon te tanmen ant plizyè pèsonalite ak polisye k ap jere fwontyè a. Malgre sa, ajan an chèf la deklare baryè a ka fèmen men se pa fason moun yo vle l la.
“Nou poko prè pou n al achte bagay pouri nan men dominiken, si y ap louvri nan kad pou 2 gouvènman yo antann yo ok men si se pou komès sèlman nou menm nou prè pou n soude pòt la e menm monte blòk“, daprè deklarasyon ansyen palmantè Wanick Pierre ki te vinn sipòte popilasyon Wanament la.
Atik sa se pwopriyete prive ©️ Gwoup Medya MAGHAITI 2023
