Gwo jounen manifestasyon te tanmen nan jounen lendi 5 septanm 2022 a, presizeman nan vil pòdepè. Objektif jounen pwotestasyon sa a, daprè manifestan yo se pou denonse premye minis Ariel Henry ak minis jistis la, Bertho Dorcé ki volè 2 sèl grenn bato yo genyen nan vil la.
Daprè sa popilasyon ki te pran lari nan vil Pòdpè a di: ” bato sa yo ki pote non “Mis Lili” ak “Elshaday” reprezante tout sa yo posede, paske se yo ki konn pote manje ak kabann epi divès lòt bagay ki sòti nan peyi lotbò dlo, tankou peyi Baamas ak Mayami pou nou“.
Nan bouch tout manifestan yo se te yon sèl refren ki se te pou premye minis lan ak minis jistis la retounen bato yo nan vil la. Popilasyon an pa te mete dlo nan bouch yo pou kalifye zak sa, tankou yon zak kidnapin epi yo te tou pwofite mande demisyon chèf gouvènman an.
Manifestan yo menase rete nan lari a pou fè dega jiskake konsène yo retounen bato yo nan vil Pòdpè. Yo te tou pwofite mande lapolis yon chans pou yo kontinye mouvman sa a san yo pa ba yo gaz lakrimojenn epi tire sou yo osnon yo menase mouvman an ap pran yon lòt faz.
Administrasyon Jeneral Ladwann (AGD) te sezi yon kagezon zam nan bato “Mis Lili” nan dat 21 jiyè 2022 a. Daprè enfòmasyon MagHaïti dispoze leta konsène yo ta rantre pran bato yo nan vil Podpè a, nan lannwit dimanche 4 septanm pou rive lendi 5 septanm 2022 a.
Atik sa se pwopriyete prive ©️ Gwoup Medya MAGHAITI 2022
