Nan yon nòt Lapolis mete deyò jounen jodi jedi 27 avril 2023 a, li fè konnen gen plizyè Inite nan enstitisyon polis la ki te mennen yon operasyon nan gwoup gang «Kokorat San Ras», nan depatman Latibonit, presizeman nan lokalite Jwanis, nan Komin Lestè.
Responsab Polis la fè konnen bandi yo te gentan chape poul yo, men ajan yo sezi anpil materyèl nan kad operasyon sa.
«Lapolis rive sezi plizyè sak siman nan baz « Kokorat San Ras», prezime bandi sa yo te vòlè. Gwoup gang sila gen pou espesyalite detounen kamyon pwovizyon machandiz tou» toujou selon nòt PNH pibliye sou paj Fesbouk li.
Sou kèk imaj ki pataje sou entènèt, nou ka wè popilasyon an ki te pote gwo kolaborasyon avèk Lapolis nan kad operasyon sa ki t ap mennen pandan jounen an pou elimine gwoup gang sa. Yo te pwofite mete dife nan anpil kay bandi yo epi sezi anpil minisyon tou.
Lapolis di l ap kontinye kenbe angajman li ki se pwoteje ak sèvi popilasyon an nan kad batay l ap mennen pou etabli lapè anndan peyi an.
Atik sa se pwopriyete prive ©️ Gwoup Medya MAGHAITI 2023
