Aprè bandi ak zam finn anvayi Mibalè ak Sodo pandan kòmansman semèn nan, plizyè zòn ap fonksyone anba kout bal nan kapital la sòti nan lannuit madi 26 septanm nan pou rive jodi jedi 28 septanm 2023 a. Selon plizyè temwen nan zòn Site Solèy, sitiyasyon sa tanmen se ta depi aprè lanmò chèf gang Tyson Samdy ak anviwon 5 sòlda l madi pase a.
Selon plizyè abitan nan Site Solèy, se ta chèf gang Matyas ki ap kontwole zòn Boston, ki ta deside touye Tyson ak kèk lòt sòlda li. Yon diskou ki pa diferan pa rapò ak deklarasyon ansyen majistra Esaïe Bochard sou Radyo Mega, ki te fè konnen lanmò sila vini akòz Tyson pa t mache sou prensip kò gang nan te mete an plas.
Site Solèy, Maren, Douya, Latan, Kwadèmisyon, Shada, Wout Nèf, se pami divès zòn ki leve anba kout bal depi aprè lanmò chèf bandi a ki te gen kontwòl Rakèt, Kafou Vensan, Douya, Tebo S.A, ak bò Asyeri Dayiti. Yon lòt kote, moun nan zòn Kwadèboukè, ak Meyè fè konnen depi nan lannuit mèkredi 27 septanm nan, bandi 400 mawozo yo anvayi yo kote anpil kout bal pa sispann chante.
Pou kounya, plizyè moun nan Site Solèy deside abandone kay yo, yon fason pou yo sove lavi yo aprè zak ansasinay chèf gang nan ki simen gwo latwoublay nan pi gwo bidonvil peyi a.
Atik sa se pwopriyete prive ©️ Gwoup Medya MAGHAITI 2023
