Twa jou aprè Inite Idrometeyowolojik Dayiti (UHM) te lanse alèt pou sezon siklòn nan ki apèn kòmanse nan peyi a, sòti ayè vandredi a pou rive jodi samdi 3 jen 2023 a anpil zòn gentan inonde nan peyi a. konsa, moun yo pa sispann mande otorite yo pou pote yo sekou akòz dega lapli kòmanse fè nan zòn yo.
Sou rezo sosyo yo, plizyè moun nan popilasyon sivil la toupatou ap mande sekou responsab yo, epi lanse SOS pou kèk zòn ki gen malè pandje sou yo. Nan menm sans la tou, nou rive jwenn plizyè videyo kote dlo gentan bwote plizyè machin ak ti kay nan Lewogan. Pi lwen toujou, nan depatman Grandans sitiyasyon an pa diferan dlo rivyè masak la menase pon ki genyen nan depatman an.
Taba, Lewogan(lawouyòn, Momans), belans(mapou, lagon) Fonparizyen, Site Solèy, Fonvèrèt, Laplèn se kèk nan kote dlo gentan anvayi moun yo. Pou kounya, enfòmasyon yo fè kwè gen anpil dega ki gentan fèt nan divès vil sa yo, men okenn bilan poko vrèman disponib pou ta konnen ki kantite dega ki fèt ni pou ta konnen si gen moun ki rive viktim.
N ap raple reprezantan UHM nan, Chrisnette Saint-Georges te fè konnen nan depatman Nip, Sid, Sidès, Grandans, Lwès, Sant, ak Latibonit gen posiblite pou lapli kontinye tonbe plis. Konsa, li envite sila yo ki rete nan zòn ki gen ris inondasyon yo, oubyen ki rete bò larivyè pou pran prekosyon pou evite gen plis viktim pandan moman siklòn nan.
Atik sa se pwopriyete prive ©️ Gwoup Medya MAGHAITI 2023
