Okap ki twouve l nan depatman Nò peyi a, ki se dezyèm vil peyi a, se inik mwayen jounen jodi a pou sitwayen ki gen aksè vwayaje pati pou yo ale lòtbò dlo, presizeman Etazini. Puiske depi kèk tan ayewopò Toussen Louvèti pa fonksyone depi plis pase yon mwa edmi.
«Wi ! Peyi a nan dram. Wi! Kapital la gen beny san k ap koule ladan l. Men, Okap ap briye pou kounye a, puiske nou se dezyèm vil peyi a. N ap viv byen, se moman pou tout moun konnen nou. Sa a w ap viv la jodi a, li nòmal. Nou gen lavi lannuit isit la, ou kapab jwenn bagay pou w manje nenpòt lè isit la. Nou paka rezime Pòtoprens pou Ayiti, se souvan konfizyon sa a kominote entènasyonal la fè sou peyi a. Pou kounye a, se moman pou n vann Okap, pou n fè pale byen sou li kòm yon espas ki fè pati Ayiti», se sa majistra adjwen Patrick Almonord rapòte avèk yon jounalis «Radio France International»
Divès Ayisyen ap travèse nan dezyèm vil peyi a pou kèk rezon byen espesifik, sitou sila yo ki nan koze pwogram imanitè Biden. Ayewopò entènasyonal Okap la, se mwayen yo itilize atravè avyon Sunrise pou yo ale lòtbò dlo.
«Se ak tristès n ap pati kite peyi a, men nou pa gen chwa. Twòp vyolans, twòp tibilans, pa gen avni an Ayiti. Fòk nou pati, se yon fòm rezinyasyon sila yo ki rete yo. Se fanmi ki gen mwayen, ki gen mwayen pou achte yon biyè avyon pou fanmi yo kite peyi a pou dènyè jou sa yo pou ale chèche lavi miyò Miyami oubyen Nouyòk.», se sa 2 jounalis Fransè fè konnen nan kad entèvyou yo t ap fè ak moun ki t ap vwayaje pou lòtbò dlo yo.
Lavi chè, kriz ekonomik, divès pwodui ap ogmante tankou pri galon gaz la, pri pwodui alimantè epi pri transpò machin piblik yo. Se divès konsta jounalis Fransè yo te fè nan kad travay yo nan peyi d Ayiti.
«Dabò nou gen sekirite nan vil Okap, nou gen tou sit natirèl, istorik epi patrimwàn. Depi an 1995 Okap klase pami vil patrimwàn nan nivo nasyonal la, kounye a nou gen pou devwa òganize nou fè anpil chanm Otèl, pou n ka resevwa etranje pou koze devlopman touris», se sa a Patrick Almonord ki se majistra adjwenn vil Okap fè konnen ak jounalis Fransè yo (Boris Vichith Ak Vincent Souriau).
Sou lòtbò, konsèy prezidansyèl Tranzisyon an vrèman an kòlè kont arete ofisyèl konsèy ministeryèl la te pibliye vandredi dènyè nan dat 12 ki sot pase la nan jounal ofisyèl «Le moniteur».
«Nou vrèman choke puiske pouvwa demisyonè a modifye prèske tout pati nan dekrè n te voye ba li a», se sa yo fè konnen nan jounal entènasyonal RFI.
Atik sa se pwopriyete prive ©️ Gwoup Medya MAGHAITI 2024
