Aprè plizyè avoka Kenyan te mande pou lajistis peyi yo bloke deplwayman polisye Kenyan yo sou teritwa ayisyen an, jodi lendi 20 me 2024 la, kèk gwo responsab nan peyi sa a debake an Ayiti. Selon Miami Herald, otorite sa yo vini pou kapab gade kòman preparasyon yo ap mache pou pèmèt antre fòs la.
«Yon ti delegasyon responsab Kenyan rive Ayiti lendi aprèmidi sa a nan yon vòl Sunrise Airways, ekip la ap gen pou vin fè evalyasyon epi enspekte konstriksyon baz la ak ayewopò a», selon sa a jounal ameriken an rapòte.
Nan detay yo bay yo, yo fè konnen ekip sa a gen ladan l kòmandan k ap gen pou l nan tèt misyon miltinasyonal la. Anplis, yo di moun sa yo ap gen pou yo pase tout semèn nan anndan peyi a pandan y ap chita pale ak otorite yo espesyalman moun Biwo Entegre Nasyonzini an Ayiti (BINUH) yo.
Pou sa a ki konsène plent avoka pati «Thirdway Alliance» yo, Ekuru Aukot ak Miruru Waweu te depoze 17 me ki sot pase a, gouvènman kenyan an fè tout moun konnen yo prèske fini ak tout dosye lajistis yo.
«Gouvènman nou an ap fini ak preparatif deplwayman an. M ka di nou sa a ak tout asirans, deplwayman an ap fèt nan jou k ap vini yo la», se deklarasyon sekretè prensipal zafè etranje kenyan an, Korir Sing’oei, te fè nan yon konferans pou laprès.
Pou kounye a, prezidan kenyan an, William Ruto, nan peyi Etazini kote l pral diskite sou divès pwen ak otorite ameriken yo. Deplwayman fòs miltinasyonal la rete youn nan sijè ki sou tab la, selon medya Kenya yo. N ap soulinye, 23 pou rive 26 me k ap vini la se dat ki prevwa pou premye twoup polisye Kenya yo ak pèsonèl èd yo mete pye yo sou teritwa ayisyen an.
Atik sa se pwopriyete prive © Gwoup Medya MAGHAITI 2024
