Jounen jodi mèkredi 21 Septanm 2022 a, plizyè sitwayen ki nan « Mouvman Leve Kanpe pou yon lòt endepandans », ki se yon estrikti ki gen ladan li atis angaje, Sendikalis, òganizasyon Fanm, peyizan, ouvriye, elatriye. Yo t al netwaye epi depoze jèb flè nan tout espas moniman papa nasyon an Jean Jacques Dessaline, aprè 3 endividi t al sal epi jete fatra sou moniman sa ayè madi an pandan jounen komemorasyon dat fè li an.
Selon atis angaje Kebert Bastien di : « Plas sa kote m kanpe la, te gen yon gwo jèb dlo ki rive la jiskake Pati Tèt Kale Ayisyen an (PHTK) ak Matelly koupe li an 2, se nan figi nou yo ki rele Mize Panteyon Nasyonal Dayiti (MUPANAH), se espas boujwa, se la yo fè resepsyon chak jou ki jou epi redui espas pèp la. Ebyen sa m ap di yo la se touprè estati Jean Jacques Dessalines, yo fè yon latrin piblik ki fèt».
Plizyè Sila ki te prezan nan depoze inisyativ sa te kòmanse poze kèk aksyon, sitou kraze latrin k ap konstrui touprè moniman anperè Jean Jacques Dessalines.
Sanba Kebert Bastien te kontinye pou li di: « Nan machann Desalin, nan kay papa anperè Jean Jacques Dessalines gen yon latrin-watè, anplis CODEVI fèt sou kay Charlemagne Peralte, gen yon politik pou yo efase memwa ewo Nasyon an, si nou wè n ap trennen se paske PHTK avèk tout alye entènasyonal avèk G9, yo antre nan politik pou yo banalize memwa nou kòm pèp».
Inisyativ pou netwaye ak jete jèb flè sou moniman Jean Jacques Dessalines lan pral fini jiska Vandredi, ou ka pote flè choublak, flè dizè, elatriye. Pou w vin depoze pandan peryòd 3 jou sa.
Atis angaje Kebert Bastien, te kontinye ajoute : « Se poutèt sa nou lanse 3 jou pou moun ka vin depoze jèb flè, si vye larenn esklavajis- rasis gen tout flè sa k ap depoze sou tonb li, se pa anperè Jean Jacques Dessalines ki envante libète pou n pa ta depoze flè pou li chak jou, kidonk n ap fè 3 jou penitans pou nou netwaye espas la ak depoze jèb flè pou papa nasyon an».
Aprè zak anti nasyonalis lan te fèt ayè madi an, kote kèk militan te chwazi souye moniman papa nasyon an, sak te revòlte anpil konpatriyòt, kote yo te menm mande pou komisè gouvènman an pousib yo epi menm pini yo pou gwo zak mepri sa.
Atik sa se pwopriyete prive ©️ Gwoup Medya MAGHAITI 2022
