Pandan nèg ak zam pa sispann atake kèk zòn nan komin Petyonvil la depi nan lannuit 19 mas la, an konsekans sitiyasyon an pa chanje jodi mèkredi 20 mas 2024 la, kote gen plizyè kadav ki gaye nan komin nan. Fas ak sitiyasyon sa a, aktivite ki konn genyen yo tankou mache nan divès riyèl yo kanpe puiske laperèz anvayi popilasyon an.
“Gen kò yo jwenn bò Otèl Wazis la, youn toupre El Rancho a yo boule”, daprè deklarasyon yon sous nou ka fè konfyans. Sepandan, gen lòt kadav toujou ki atè nan plizyè lòt riyèl, men pa gen detay ki disponib pou ta vrèman konnen nan ki sikonstans endividi sa yo jwenn lanmò yo.
Pandantan sa a, Metivye, Dòko, Dyèg, Meyòt Bristou, Jirado se pami zòn ki te anba anpil tire ayè madi a. Pou kounye a, selon divès imaj legliz katolik Sen Jan Bosco ki toujou gen machann douvan li, ak mache ki tou pre l yo pa gen pyès machann k ap vann machandiz, kon sa a tou divès gwo antrepriz blije kenbe pòtay yo fèmen puiske sitiyasyon sekiritè a vin pi mal nan komin nan depi menm avan lanmò anviwon 15 lòt endividi dimanch ki te 17 mas 2024 la.
Atik sa se pwopriyete prive ©️ Gwoup Medya MAGHAITI 2024
