Repòte San Fwontyè nan tèt kole ak 90 jounalis ayisyen lanse yon apèl, jodi madi 16 avril 2024 la, pa bò kote Kominote entènasyonal la ak Konsèy Prezidansyèl Tranzisyon an (KPT) pou plede an favè pwofesyonèl enfòmasyon yo nan peyi a nan sa k gen pou wè ak pwoteksyon lavi yo. Preyokipasyon pwofesyonèl sa yo chita sou ensekirite a ki pa sispann frape jounalis yo sitou pandan dènye ane sa yo.
«Nou menm jounalis ayisyen, n ap viv chak jou nan yon laperèz pou yo pa agrese n, kidnape n, asasinen n. Nou vle atire atansyon sou tout katye nan Pòtoprens la moun vin pa ka ale ladan yo, nou vle atire atansyon an tou sou konsekans estriktirèl kontèks ensekirite jeneralize a. Enfrastrikti yo an degraba, fòmasyon pa ka fèt, pwoblèm finansye redaksyon yo, kondisyon materyèl travay nesesè pou travay jounalis yo ki plis», se kèk nan bagay yo presize nan demann yo fè a.
Yon lòt kote, yo mete aksan tou sou konsekans grav ensekirite sa lakòz jounen jodi a. Sèl mwayen pou yo kontinye viv se swa yo abandone metye a oubyen pati kite peyi a. Puiske pi devan yo raple pou ane 2022 a, gen pou pi piti 6 jounalis ki te jwenn lanmò yo pandan yo t ap travay.
Pami 90 jounalis sa yo, Repòtè San Fwontyè (RSF) fè konnen nan yon atik yo ekri : «Gen jounalis nan divès medya ki siyen demann nan.» Pami yo nou jwenn Frantz Duval pou Le Nouvelliste, Jacques Desrosiers pou sekretè jeneral Asosiyasyon Jounalis Ayisyen yo(AJH), Jean Daniel Sénat pou Radio Magik9, Jean Pharès Gérôme pou korespondan RSF an Ayiti, Milo Milfort pou Enquêt’Action, Lionel Édouard pou Televizyon Nasyonal d Ayiti (TNH), Guerrier Dieuseul pou Radyo Televizyon Karayib (RTVC) ak lòt ankò.
N ap presize, nan dènye rapò Rezo Nasyonal k ap Defann Dwa Moun yo (RNDDH) te sòti mèkredi 10 avril pase a, yo te fè konnen gen 11 jounalis ki viktim sòti janvye pou rive mas 2024 la. 8 ladan yo se pandan manifestasyon kont gouvènman Ariel Henry a yo te viktim, alòske jounalis Lucien Jura te sibi zak kidnapin, pandan jounalis espòtif Nerval Pierre Viliat li menm rive mouri aprè l te fin pran yon bal mawon.
Atik sa se pwopriyete prive ©️ Gwoup Medya MAGHAITI 2024
