Plis pase 578,000 moun nan peyi a deplase kite kay yo akoz vyolans gang yo ki pa sispann ogmante daprè yon rapò biwo Nasyon zini pou kowòdinasyon afè imanitè (OCHA) an Ayiti mete deyò. Pou l apiye done li yo, òganizasyon an site Òganizasyon entènasyonal migrasyon an (OIM).
Daprè sa òganizasyon onizyen an fè konnen, sòti nan mwa mas pou rive nan mwa jen 2024 sa, kantite moun ki deplase yo ogmante pa 60%, sòti nan 362,000 a plis pase 578,000. Pami moun sa yo ki kouri kite kay yo a, gen yon total 85% k ap viv nan fanmi dakèy epi lòt 15% an li menm ap viv nan plizyè sit.
Si n kwè rapò OIM nan, genyen yon ogmantasyon 15% nan moun ki deplase yo nan zòn metwopolitèn Pòtoprens lan, ak 130% nan Gran Sid peyi a. Òganizasyon an presize tou jan yo te wè yon gwo foul moun ki deplase sòti nan kapital la pou ale nan rejyon sid peyi a.
OIM soulinye pou l raple se depi 29 fevriye 2024 la vyolans gang yo ogmante pi plis nan kapital la. Sa ki, daprè li menm te pote ale lavi plizyè moun epi plizyè byen leta ak prive te rive kraze.
Atik sa se pwopriyete prive ©️ Gwoup Medya MAGHAITI 2024
