Nan divès lokalite tankou Taba, Tijo, kwadèboukè, Ri 4, plis pase 40 kadav te epapiye nan tout lari yo ayè dimanch 3 mas 2024 la. Moun sa yo jwenn lanmò yo se pandan moman tansyon ak latwoublay ki te genyen ant Lapolis ak bandi nan peyi a, selon Radyo ak televizyon Karayib (RTVC).
Depi aprè atak bandi sou Penitansye Nasyonal samdi ki sot pase a, se te pral tou pa prizon sivil kabarè a ki te kase ayè dimanch 3 mas la. Anplis, plizyè kadav te pral epapiye nan plizyè lokalite, lè n konte 4 nan zòn Tijo, 4 nan komin Taba bò Inivèsite Fondasyon Jean Bertrand Aristide la, youn nan zòn Ri 4, omwen 10 lòt nan anviwon prizon penitansye a, ak lòt toujou.
Paralèman, plizyè lòt enstitisyon nan komin kwadèboukè aktyèlman fèmen pòtay yo, tankou Tribinal lapè, komisarya kwadèboukè a, Bank Nasyonal Kredi (BNC), akòz zak banditis ki fèt sou yo, toujou selon RTVC.
Alòske, gouvènman repiblik la dekrete eta Ijans nan tout depatman lwès la, sòti ayè dimanch la pou rive mèkredi k ap vini la. Yo mete pinga pou pèsonn endividi ki pa fè pati polisye, jounalis, anbilans, ak pèsonèl sante pou pa sikile nan lè pita pase 6è nan aswè pou rive 5è nan maten, akòz desizyon kouvrefe a.
Sou lòt bò a, lapolis kontinye ap veye plizyè prizonye ki sove nan penitansye ak prizon sivil kabarè a, tankou Clifford Brandt, Dimitry Hérard, Jean Laguel, Michelet Virgile, elatriye. Poutan, Cholzer Chancy, Macky Kessa, Joseph Félix Badio ak Robinson Pierre-Louis yo menm te deside rete nan selil yo.
Atik sa se pwopriyete prive ©️ Gwoup Medya MAGHAITI 2024
