Alòske vòl sekou yo ap kontinye nan tout rakwen Pòtoprens la, gouvènman ameriken an fè konnen yo menm yo gentan retire plis pase 340 sitwayen pa yo an Ayiti. Selon Miami Herald, pami moun sa yo genyen ki te oblije pase nan ayewopò Okap la pou fè vwayaj la.
“Pòt pawòl Depatman d Eta ameriken an, Matthew Miller te deklare gouvènman ameriken an te rann sa a fasil pou plis pase 340 sitwayen ameriken ale lwen Ayiti depi 17 mas“, daprè sa a jounal la fè konprann pandan yo soulinye pami moun sa yo gen 250 ladan yo ki te kite Ayiti pandan yo te Pòtoprens e gen 100 lòt menm se Okap yo te ale.
Pandantan sa a, elikoptè pa sispann vole nan espas ayeryen ayisyen an jiska maten madi 26 mas 2024 la. Nan ka sa a, responsab ameriken an fè konnen ayè lendi a te gen twa vòl yo te rive fè, e jodi madi a ankò yo anonse y ap fè 4 vòl pou kontinye vin pran sitwayen ameriken yo sou teritwa ayisyen an.
Nan kad dosye sa a, prèske tout peyi ki gen resòtisan yo an Ayiti tanmen òganize yo pou retire yo nan peyi a. Se menm ka a pou Lafrans, Lachin, Kanada, Kiba ak lòt ankò.
N ap fè konnen, ayè lendi 25 mas la vòl yo kòmanse reprann nan ayewopò Okap la, aprè anviwon 3 semèn depi tout aktivite ayeryen yo te kanpe. Se Konpayi Sunrise Airways ki te resi òganize vòl espesyal la kote te gen 155 moun, pami yo te gen benefisyè ayisyen nan pwogram imanitè Biden nan. Pou semèn sa a, konpayi a pwograme vòl pou mèkredi ak vandredi an destinasyon Miyami e tikè yo ap koute $ 979 ameriken pou ale a sèlman.
© Tous droits réservés – Groupe Média MAGHAITI 2024
