Ayè madi 14 fevriye 2023 a, Fabrizio Poretti ki se anbasadè peyi Lasuis an Ayiti fè konnen nan emisyon «Le Point» sou Tele Metwopòl, yo pare pou remèt Ayiti tout kòb fanmi Duvalier te genyen bloke nan peyi yo a.
Kantite lajan fanmi Duvalier genyen nan konfederasyon èlvetik la se 6,5 milyon fran suis. Ebyen anbasadè ki reprezante Lasuis an Ayiti a fè konnen yo pare pou remèt Ayiti kòb sa lè peyi a genyen yon gouvènman eli.
«Nou kreye yon lwa k ap pèmèt lajan sa al jwenn ayisyen yo. Se pa yon kòb nou pral lage nan kès Bank Repiblik Dayiti oubyen nan kès ministè Ekonomi san kontwòl.» se premye mo anbasadè a.
Anbasadè a te pwofite di li siyen yon akò ak gouvènè Bank Repiblik Dayiti a Jean Baden Dubois kote yo jwenn yon espas pou mete lajan sa a. Yo bay garanti y ap remèt lajan an se lè gen yon gouvènman demokratik ki eli an Ayiti.
Fanmi Duvalier te dirije Ayiti sòti 1957 pou rive 1986. Anpil sous fè konnen se Jean Claude Duvalier ki te sere kòb sa a nan yon Bank Lasuis. Anbasadè Lasuis la di gouvènman l lan sere lajan sa nan yon lòt Bank ki pa Lasuis ni Ayiti.
«Lè sa, prezidan Lasuis la ak Prezidan ki eli an Ayiti a ap siyen yon papye pou lajan sa ka soti pou vinn envesti an Ayiti.» se sa Fabrizio Poretti fè konnen.
N ap raple premye fevriye 2011, Lasuis te pran yon lwa ki rele “Lex Duvalier” kote yo te bloke tout lajan ansyen diktatè Jean Claude Duvalier te genyen nan peyi yo a.
Avan li te mouri nan lane 2014, Duvalier ki te gen ti non jwèt “Baby Doc” te di lajan sa yo pa te pou li, men pou yon fondasyon.
Photo: La loi de ma bouche
Atik sa se pwopriyete prive ©️ Gwoup Medya MAGHAITI 2023
