Jounen lendi 22 me a, ouvriye faktori SONAPI yo te tanmen yon lòt mouvman pwotestasyon kote yo fè konnen y ap kontinye mobilize jouskaske Leta satisfè revandikasyon yo. Konsa, yo pwofite envite lòt anplwaye nan divès faktori jwenn ak pou ranfòse yo.
Aprè plizyè sòti yo fè pandan kòmansman mwa me a, ouvriye SONAPI yo pa deside sispann manifeste. Nan sans sa, yo pa mete dlo nan bouch yo pou denonse responsab nan Leta yo, epi pwofite kontinye mande yon pi bon kondisyon lavi, ak yon pi bon salè.
“Leta ap fè kòm si l pa tande, si yo te ba nou 2500 GDS la ak tout sekirite nan peyi a nou t ap travay”, se deklarasyon youn nan manifestan yo ki rete kwè si lòt anplwaye nan faktori yo tankou “Caracol” antre nan mouvman an l ap pi fasil pou yo jwenn yon repons ki pi rapid.
Pou kounya, sitwayen yo anonse yo pap pran pawòl, paske revandikasyon yo pap chanje. Osnon yo pwomèt y ap toujou foule beton an jouskaske Leta di yon mo pou yo.
Atik sa se pwopriyete prive ©️ Gwoup Medya MAGHAITI 2023
