Plizyè santèn ouvriye k ap travay nan Pak Endistriyèl Metwopolitèn(SONAPI) manifeste byen bonè jodi lendi 8 me a pou mande responsab yo ogmante salè yo epi ba yo akonpayman sosyal. Sou plizyè pankat yo ekri, yo fè konprann se 2500 goud yo bezwen kòm salè minimòm.
“Nou egzije 2500 GDS kòm salè minimòm, aba salè tibèkiloz”, daprè sa ki ekri sou kèk pankat ki nan men manifestan yo. Nan menm sans la, yo fè konnen yo bezwen akonpayman sosyal tou menm jan polisye yo gen ti kat pa yo a.
Yon lòt bò, pwotestatè yo denonse moun ki responsab gwo antrepriz sa yo ki selon sa yo di ap maltrete yo. Konsa tou, yo lonje dwèt yo sou Ofis Nasyonal Asirans-Vyeyès(ONA) ki yo menm se “gran nèg yo prete sèlman” alòske yo refize bay yo sèvis chak lè yo menm ouvriye yo bezwen sa.
“N ap mande pou nouvo direktris ONA a pou l pran responsabilite l pou gagòt ak kòripsyon fini nan ONA, pou ouvriye yo ka jwenn sèvis Kòmsadwa“, se kri sitwayen sa yo ki di non ak kònpòtman sa gwo responsab yo genyen kont yo a.
© Tous droits réservés – Groupe Média MAGHAITI 2023
