Nan kad yon operasyon li fè jounen lendi 26 dawout 2024 la nan tèt kole ak komisè Jean Ernest Muscadin nan komin Tigwav, komisè Elioth Pierre Paul arete 2 prezime bandi.
Komise gouvènman vil Tigwav la, Elioth Pierre Paul mennen jodi lendi 26 dwaout 2024 la, yon operasyon ansanm ak komisè gouvènman Miragwàn nan, Jean Ernest Muscadin. Pandan operasyon sa, 2 prezime bandi rive jwenn arestasyon yo.
Responsab jiridiksyon Tigwav la ki t ap bay detay sou jan sa te pase a deklare se yon rezo gang k ap monte nan komin nan pou sèvi antèn pou gang nan kowalisyon “Viv ansanm“ yo.
Yon lòt kote, komisè Pierre Paul fè konnen gen youn nan endividi yo ki te gen nan men l anviwon 50 katouch ak chajè. Pandantan sa tou nan temwanyaj li, sispèk la di komisè a yo se anviwon 17 nan baz la. Se nan moman sa tou li tou bay kote otorite yo ap jwenn zam yo.
Arestasyon sa ki rive fèt nan Tigwav la daprè komisè a se gras ak kolaborasyon manm nan popilasyon an. Nan sans sa, Elioth Pierre Paul mande ak sitwayen yo pou yo kontinye ede yo nan founi yo bon jan enfòmasyon pou yo ka desitire bandi nan vil la.
N ap soulinye, youn nan prezime bandi sa yo twouve l lopital, puiske li te endispoze aprè l te aprann komisè Muscadin te nan oprasyon an tou.
Atik sa se pwopriyete prive ©️ Gwoup Medya MAGHAITI 2024
