Ayè lendi 29 jiyè 2024 la, otorite yo nan peyi Jamayik, depòte 35 migran Ayisyen nan peyi yo. Migran sa yo te antre nan peyi yo a nan bato, sou plaj Kensington nan zòn Portland jou ki te dimanch 28 jiyè 2024 la.
Selon enfòmasyon jounal Jamayiken an, Jamaica Gleaner rapòte pami 35 Ayisyen sa yo te genyen 29 gason, 5 fanm ak yon timoun. Li presize pou l di yo te ateri Jamayik nan 5è nan maten. E yo konfime nan mwens pase 24è tan otorite yo ta pral voye yo tounen nan peyi yo, aprè lapolis te fin enfome sou sitiyasyon an.
Selon deklarasyon gwoup Ayisyen sa yo, yo fè kwè yo te oblije fè vwayaj sa e yo fè konprann se nan lide pou chape poul yo pou pèsekisyon, ensekirite, vyolans gang yo ak mwayen ekonomik ki pa genyen nan peyi a. Efektivman, sitwayen sa yo se pami plizyè milye fanmi ki pa sispann kouri depi kèk lane pou lamizè ak ensekirite ki tabli kò l anndan peyi a.
Daprè jounal etranje a, se aprè yo te fin sibi tès depistaj ak egzamen medikal, Ayisyen sa yo ta pral retounen nan peyi yo. E yo fè konnen sitwayen sa yo retounen Ayiti sou yon bato Gad Kòt Jamaica Defense Force (JDF), ki te kite Boundbrook Wharf nan Port Antonio.
Pandantan sa, nan yon rapò li te pibliye nan dat 17 desanm 2021 an, Òganizasyon entenasyonal migrasyon (OIM) te fè konnen migran ki vwayaje sou bato olye avyon yo souvan vilnerab. Se pou sa yo te mansyone se plis moun ki soti nan zòn pwovens yo ki souvan oblije vann afè yo osnon prete lajan ak gwo enterè pou kapab peye vwayaj la.
Daprè estimasyon yo, pri vwayaj sa yo se ant 350 ak 700 dola vèt. Men tou, sa depann sou ki kalite bato ak kibò pasaje yo vle rive, sa ki fè lajan an kapab rive 5 ant 5 000 ak 7 000 dola ameriken.
N ap fè remake, nan lannwit 16 pou louvri 17 jiyè 2024 la, 40 migran te disparèt nan vil Okap. Poutan, se yon sitiyasyon ki pa anpeche Ayisyen kontinye fè vwayaj an kachèt pou al chache yon lavi miyò. Pandantan sa, n ap soulinye jouskounya otorite ayisyen yo poko janm anonse yon seri mezi pou rive konbat move pratik sa yo.
Atik sa se pwopriyete prive ©️ Gwoup Medya MAGHAITI 2024
