Nan yon nòt yo fè sòti jodi madi 12 desanm 2023 a, Direksyon Jeneral Migrasyon(DGM) nan peyi Sendomeng fè konnen yo depòte 324 migran Ayisyen nan peyi a. Selon sa yo fè konprann sitwayen ayisyen sa yo te pase nan zòn Bahoruco pou antre sou teritwa yo a san okenn papye legal.
“Pami sitwayen ayisyen sa yo ki pa an règ ak migrasyon an nou jwenn 247 gason ak 50 fanm nan operasyon sa ajan Direksyon Jeneral Migrasyon te mennen an“, Daprè detay enstans konsène a bay.
Pi lwen, yo soulinye aprè yo te finn arete yo nan zòn antèn Polo(Bahoruco), ajan yo te tou tanmen ak pwosesis depòtasyon an pou 324 sitwayen sa yo. Konsa, yo te itilize fwontyè Elias Pina ak fwontyè ki Jimaní an pou te voye migran Ayisyen sa yo an Ayiti.
Pou sa ki konsène wout Bahoruco a, jounal Listín Diario fè kwè se yon wout anpil dominiken itilize pou fè kòb ak ayisyen, yon fason pou ka fè yo antre sou teritwa yo a pi byen san okenn papye legal. Se vre yo poko idantifye gwoup trafikan sa yo, men jounal la rapòte otorite yo anonse y ap fè kou yo konnen pou jwenn moun sa yo.
Autor de la foto: Diario Libre
Atik sa se pwopriyete prive ©️ Gwoup Medya MAGHAITI 2023
