Jounen jodi samdi 13 avril 2024 la, otorite nan peyi Brezil jwenn 20 kadav migran ayisyen nan lanmè lakay yo, daprè plizyè pechè kadav moun sa yo te kòmanse dekonpoze. Yo te menm rive nan yon eta grav, selon Radio France International (RFI).
Se yon veritab trajedi, kò moun sa yo te ensipòtab lè yo te jwenn yo nan kot nò Brezil la, presizeman nan vil Bragans, selon sa a pòt pawòl polis federal la rapòte.
Li ajoute : «Nou te jwenn kò migran sa yo tankou moun ki mouri swaf dlo ak grangou, kidonk nou pral lanse yon ankèt byen rapid pou n ka konnen sikonstans egzat trajedi sa a, presizeman idantifye non viktim yo.»
Sitiyasyon migrasyon sou bato pa sispann lakòz plizyè viktim nan kan ayisyen yo. Gen anpil nan yo ki riske vi yo nan lanmè se pou yo te ka rantre nan yon lòt peyi pou ale chèche lavi miyò.
N ap raple n gadkòt ameriken sot voye retounen 65 ayisyen semèn ki sot pase a. Yo te fè sa a akoz yo t ap eseye rantre nan peyi a ilegal menmsi yo te vwayaje nan kondisyon difisil epi menm riske lavi yo pou rantre Etazini nan pase sou wout Great Inagua, presizeman nan peyi Bayamas, selon sa a jounal Miami Herald te rapòte.
Atik sa se pwopriyete prive ©️ Gwoup Medya MAGHAITI 2024
