Otorite Ameriken yo anonse jodi madi 31 janvye 2023 a, gen 4 sitwayen ki deja rive Miyami pou y al reponn kesyon lajistis nan kad dosye lanmò ansyen prezidan Jovenel Moïse la. James Solages, Joseph Vincent, Emmanuel Sanon epi Germán Rivera se non akize sa yo ki pral gen pou eksplike lyen yo ta genyen ak dosye sa, daprè Miami Herald.
Malgre lajistis Ayisyen poko di anyen sou transfè 4 sitwayen sa yo ki gen divès nasyonalite, otorite nan peyi Etazini yo menm fè konnen prezime akize sa yo rive Miyami, epi yo gen pou parèt devan lajistis pou reponn ak akizasyon ki peze sou do yo a.
«Otorite Ameriken yo arete madi sa, yon gwoup sispèk Ayisyano-ameriken epi Kolonbyen aprè yo fin transpòte sòti Ayiti pou rive Miyami kote yo pral fè fas kare ak akizasyon konplo ki gen pou wè ak asasinay prezidan Jovenel Moïse la», daprè sa Miami Herald fè konnen.
Toujou nan menm kad dosye sa, daprè dediksyon Ameriken yo fè jiskaprezan Emmanuel Sanon ki se yon pastè Ayisyen se te moun ki te dwe ranplase 58yèm prezidan an, si sanblan plan kou deta ki t ap prepare a te fèt jan l te planifye a. Nan sans sa, otorite federal yo te mansyone Sanon te patisipe nan plizyè reyinyon konplotay kote yo site non Solages ak Vincent ki ta patisipe nan moun ki te ede jwenn mwayen pou touye ansyen chèf leta a.
Pou kounya, poko gen okenn rezilta ki tonbe
bò kote otorite pa nou yo, osnon yon 5yèm jij ki tanmen plizyè odisyon san jwenn rezilta. Sa ki parèt diferan bò kote Ameriken yo ki deja mete anba kòd Mario Palacios, Rodolphe Jaar epi anyen senatè Jhon Joël Joseph.
Photo: Chandan Khanna
Atik sa se pwopriyete prive ©️ Gwoup Medya MAGHAITI 2023
