Nan yon nòt Ofis Pwoteksyon Sitwayen(OPC) fè sòti jounen dimanch 30 oktòb 2022 a, li kondane zak ansasinay sou ansyen kandida pou prezidans lan Éric Jean-Baptiste. Nan sans sa, enstitisyon an mande pou leta ta jwenn yon solisyon rapid ak sitiyasyon sa a k ap degrenngole nan peyi a.
2 jou aprè lanmò prezidan pati politik Rasanbleman Demokrat Nasyonal Pwogresis yo (RDNP), enstitisyon yo ak lòt politisyen pa te pran tan pou reyaji.
«Li lè li tan pou n jwenn yon solisyon pou n frennen zak bandi ak zam, k ap touye, vyole, vòlè san jwenn santans», daprè sa OPC fè konnen nan nòt sila a.
Enstitisyon ki la pou pwoteje dwa moun yo di yo endinye fas ak lanmò responsab RDNP a ak tout sekirite li, nan dat ki te vandredi 28 oktòb pase a, nan zòn Laboul 12. Mete sou sa, Ofis Pwoteksyon Sitwayen an di li konstate zak kriminèl sa yo pa sible lòt moun sinon pitit peyi a ki gen kapasite pou rebati peyi a. «Vyolans òganize sa vize fanm ak gason ki chaje ak talan, ki fèt pou jwe yon gwo wòl nan rekonstriksyon peyi dayiti», toujou daprè sa yo ekri.
N ap raple atak sa ki mennen ak lanmò Otè liv: «tè natal nan tè pwomiz» la se dezyèm atak li sibi aprè l te finn chape poul li anba men nèg ak zam, jou ki te premye oktòb 2018 la, nan zòn Kafou Fèy.
Atik sa se pwopriyete prive ©️ Gwoup Medya MAGHAITI 2022
