Nan yon kominike Biwo Entegre Nasyonzini (BINUH) mete deyò jounen jodi vandredi 19 avril 2024 la, yo di gen omwen 82 timoun ki mouri ak blese anba bal bandi pandan janvye pou rive mas ane sa. Pandanstan, yo di tou gen yon pakèt timoun ki vin manm gwoup gang yo epi patisipe nan kèk zak kriminèl.
“Aktivite gang yo vrèman bloke sèvis esansyèl nan peyi a tankou swen sante, edikasyon epi ogmante ensekirite alimantè yo“, soulinye Maria Isabel Salvador, reprezantan espesyal sekretè jeneral nan Loni ak chèf BINUH an. Nan kominike a, yo soulinye nan 82 timoun ki mouri oubyen blese ak bal yo, gen ladan yo ki gen 6 lane pou pi piti. Pi douvan, yo fè kwè timoun ki nan gang yo se rezon sosyal ak ekonomik ki lakoz sa.
Toujou nan menm kominike sa, BINUH kontinye pou li di gen vyolans seksyèl ki fèt sou abitan nan lòt kan rival bandi yo nan kad afwontman yo. Anplis, nan kèk kote nan kapital la, divès fanm ak tifi, bandi kenbe yo lè yo pral travay oswa pral lekòl pou mete ansanm pou vyole yo. Responsab yo presize gen kèk nan yo ki konn mouri aprè yo fin sibi vyòl anba men bandi, mete sou sa gen lòt ki sibi vyòl nan kan refijye yo.
Pou fini, òganis la mansyone vyolans ak menas pa sispann fèt sou moun k ap defann dwa moun yo. Yo site jounalis epi manm sektè jiridik yo, sa ki selon yo menm pouse yo kite lakay yo epi limite nan kad aktivite pwofesyonèl yo.
Atik sa se pwopriyete prive ©️ Gwoup Medya MAGHAITI 2024
