Jan sa te anonse lendi pase a, jodi mèkredi 11 oktòb 2023 a, gouvènman dominiken an relouvri fwontyè terès la nan bò pa li a. Men jouskounya jan responsab dominiken yo te prevwa l la sa pa fèt konsa, puiske pa gen okenn echanj komèsyal ki rive fèt ant Repiblik Dominikèn ak Ayiti, selon Listín Diario.
9è 40 nan maten se ak lè sa sòlda dominiken yo te louvri pòt pa yo a jodi mèkredi a, an prezans yon manb Direksyon Jeneral imigrasyon yo a, Elio Uceta.
Daprè responsab la, nan divès reyinyon ki te tanmen ant otorite 2 peyi yo, gen yon responsab ayisyen enfliyan ki te dakò ak kondisyon pou lè pòt dominiken an louvri pou se sèlman echanj komèsyal ki fèt. Sa ki pa respekte selon konsta Elio Uceta ki sezi wè malgre akò yo te jwenn pòt pa Ayiti a rete fèmen.
Yon lòt kote, ajan enterimè vil Wanament la, Luma Demetrius fè konnen jodi a menm yo te gen yon ti pale ak otorite dominiken yo kote li di gen demach ki fèt pou machann ayisyen yo ta al pran machandiz yo nan Dajabón. Konsa tou, dominiken ki gen afè yo sou bò pa nou an ap kapab rekipere machandiz pa yo tou.
Pou sa ki konsène mache Dajabón nan ki te pran dife jodi mèkredi a, li fè konnen dominiken yo dakò pou nou fòme komite pa nou e yo menm tou y ap fè pa yo, yon fason pou kabap evalye tout machandiz ki pèdi nan dife a.
“Ayisyen ki gen depo lòtbo a ap kreye yon komisyon pou konn dega ki genyen yo epi pou suivi fèt pa rapò ak moun sa yo ki te gen machandiz. Kidonk, nou menm antanke otorite nou pral reyini ant nou nan yon ti tan pou pèmèt 2 komisyon sa yo kreye byen vit pou moun ki gen machandiz gaye nan lari al pran yo e pou moun ki pèdi yo ka fè evalyasyon ak komisyon 2 peyi yo”, sa fè chèf vil la deklare li antann ak responsab dominiken yo anplis sekirite moun sa yo k ap garanti lè yo pral pran afè yo.
Pandantan sa, majistra vil Dajabón nan, Santiago Riveron deklare gen pou pi piti 28 seksyon kote yo te vann rad, bagay pye nèf, pafen, ak bwason alkolize ki te pran dife. N ap raple prezidan Asosiyasyon komèsan ayisyen yo, Clément Pierre te di sou Radyo Karayib se komèsan ayisyen ki plis viktim ak dife sa ki te pete nan mache a jodi mèkredi a.
Atik sa se pwopriyete prive ©️ Gwoup Medya MAGHAITI 2023
