Nan yon kominike yo pibliye jodi mèkredi 27 mas 2024 la, ambasadè ak delege peyi d Ayiti nan UNESCO a, Dominique Dupuy enskri Konpa ayisyen an pou antre nan patrimwàn kiltirèl imateryèl imanite. Nan kad kandidati sa a, delege a eksprime kè kontan l pou fason li jwenn kout men pandan plizyè mwa pou te rive nan faz sa a.
«Ekselans Madam Dominique Dupuy soumèt ofisyèlman kandidati Konpa | _Compas d’Haïti_ pou enskri l sou lis reprezantatif nan patrimwàn kiltirèl imateryèl imanite», daprè sa yo fè konnen nan kominike sa a pandan yo pa bliye remèsye tout aktè nan sektè kiltirèl la ak tout lòt enstitisyon ki te kontribye nan demach sa a.
Nan menm sans sa a, ministè kominikasyon bò kote pa l raple Konpa se idantite tout ayisyen keseswa sou plan nasyonal oubyen entènasyonal se pou sa yo di: «Dans ak mizik Konpa senbolize idantite n e yo patisipe nan fè moun pale sou nou nan entènasyonal la sou plan kiltirèl. Pratik sa a li enskri nan rejis Nasyonal Patrimwàn Kiltirèl Imateryèl Ayiti, depi 21 oktòb 2019 e li selebre an Ayiti 26 jiyè, atravè jounen nasyonal Konpa dirèk».
Pou kounye a, enstriksyon sa a ki fèt an favè Konpa ayisyen an se twazyèm koze Ayiti mande pou mete nan patrimwàn kiltirèl yo depi lè konvansyon sa te siyen nan lane 2003. Soup joumoun avèk kasav se 2 pwodui ayisyen yo rekonèt deja kòm patrimwàn kiltirèl ayisyen nan je mond lan.
© Tous droits réservés – Groupe Média MAGHAITI 2024
