Nan kad komemorasyon jounen entènasyonal Albinis lan, Ofis Pwoteksyon Sitwayen ak Regwoupman ak Sansibilizasyon pou Byennèt Albinòs an Ayiti te chwazi òganize yon aktivite jodi madi 13 jen 2023 a, anba tèm «L’inclusion fait la force».
Plizyè gran pèsonaj ak kèk albinòs te prezan nan kad jounen entènasyonal Albinis la, tankou Nephtalie Jusmé (Prezidan RESBAH), Pwofesè Auguste D’Meza epi pwotektè Renan Hédouville.
«Selebrasyon jounen Entènasyonal Albinis pral gen tout sans li, se lè tout moun ki nan kominote yo kapab pa viktim diskriminasyon, eksklizyon epi jouman anndan sosyete Ayisyen an», selon deklarasyon responsab OPC a Renan Hédouville.
Albinis se yon maladi ki sòti nan jenetik. Li gen konsekans sou po avèk zye yo. Anplis, gen kèk timoun li rive chanje koulè yo ak cheve yo. Albinis konn lakoz anpil moun sibi diskriminasyon poutèt koulè po yo oubyen anomali sila.
“Nan yon sosyete kote chak jou pi plis y ap estigmatize sila yo ki Albinòs anndan peyi a, nou gen pou devwa batay pou sa epi fè konnen egal avèk tout moun, menm jan sa ekri nan listwa nou « Nou tout fèt lib ak egal an dwa»”, toujou selon pwotektè Renan Hédouville.
«Leta santral dwe fasilite antre pwodui ki ka penmèt yo reponn avèk swen po sila yo ki Albinòs, tankou krèm ak linèt solèy, elatriye», pou enfòme prezidan RESBAH, Nephtalie Jusmé.
Pwotektè sitwayen Renan Hédouville, fè konnen «Leta Ayisyen ak kominote entènasyonal la dwe jwe wòl li, pandan Ofis Pwoteksyon Sitwayen kontinye kenbe angajman li pou sila yo ki Albinòs yo ak lòt kouch anndan sosyete a.»
Malgre peyi Dayiti gen anpil Albinòs, men anpil sila pa sispann viktim kèk pawòl kou ravèt blanch, poul blanch, elatriye.
«Fòk leta Ayisyen chita sou entegrasyon Albinòs yo nan pwogram ak pwojè politik li yo, sitou atravè ladwann epi fasilite rekritman Albinòs ki gen diplòm an Ayiti pou travay. Anplis, pwofesè lekòl yo dwe gen konsiderasyon pou pwoblèm wè byen Albinòs yo pandan y ap suiv kou», selon deklarasyon prezidan Nephtalie Jusmé.
Sou lòtbò, plizyè temwanyaj te bay atravè komemorasyon jounen entènasyonal Albinis anndan Ofis Pwoteksyon Sitwayen.
«Malgre tout jefò m fè, m plede depoze CV men yo pa janm rele m pou m travay. Anplis, m souvan ap viktim estigmatizasyon bò lakay mwen. Menmsi m gen yon pitit epi mwen marye», selon sa yon viktim rapòte nou.
Atik sa se pwopriyete prive ©️ Gwoup Medya MAGHAITI 2023
