Endividi ak zam lakoz dife pran nan yon kamyon sitèn gaz jodi madi 4 jen 2024 la nan zòn Kafou Ayewopò. Selon Radio Télé Galaxie, aksyon sila pase aprè bandi ak zam t ap eseye detounen kamyon an pou antre nan zòn yo.
Selon deklarasyon chofè kamyon ki boule a medya a rapòte, machin sa ki te plen gaz la rive pran dife aprè machin nan te resevwa plizyè enpak bal. Yo eksplike sa rive fèt nan moman kèk polisye nan blende lapolis t ap anpeche endividi ak zam yo detounen machin sa.
“Yo te tire nan kamyon an, e se depi anba a li t ap pran dife, puiske gaz la t ap tonbe nan kawotchou yo epi yon moun atè a di chofè a sa ki aprèsa sa te kouri kite machin nan“, daprè pawòl yon sitwayen ki deklare se yo menm ki te rele ponpye pou te evite plis dega.
Mete sou sa, yo fè konnen avan aksyon sa te pase nan Kafou Ayewopò, bandi yo te gentan detounen yon kamyon sitèn gaz ki ta prale Dèlma 3. Yo presize endividi yo te fè chofè a mennen machin nan nan Dèlma 18. Pandantan sa, n ap soulinye ayè lendi 3 jen an responsab yo nan Tèminal Vare a te fè konnen gen 102 kamyon sitèn chaje ak gaz ki te kite sant estokaj la.
Pou kounye a, selon plizyè videyo ki pataje sou rezo sosyo yo ponpye yo rive etèn dife a. Fòk nou di malgre, entèvansyon ponpye yo sa pa anpeche gen plizyè machann ki pèdi machandiz yo t ap vann nan wout la.
Atik sa se pwopriyete prive ©️ Gwoup Medya MAGHAITI 2024
