Endividi ak zam rive kraze byen bonè maten jedi 29 fevriye 2024 la, yon pati nan miray Akademi Nasyonal Polis la (ANP) ki chita kò l nan Wout Frè. Selon Kòdonatè Sendika Nasyonal Lapolis la(SYNAPOHA), Lionel Lazarre se ta gang kraze baryè yo ki ta komèt zak sila.
Daprè sa kòdonatè a fè nou konnen se ta anviwon 2 miray ki sibi atak bandi yo. “Gen youn ki sou pati chan de tir la, lòt la se sou bò teren an. Enfòmasyon yo fè konnen se nèg Vitelhomme yo ki fè l”, yon deklarasyon ki pa diferan ak divès imaj ki ap sikile sou rezo sosyo yo ki montre a klè fason endividi yo fè atak la sou enstitisyon polisyè a.
N ap soulinye, nan divès zak malonèt ki genyen nan peyi a, Akademi an se youn nan kote ki pa epanye, puiske nan yon premye tan nèg ak zam te ansasinen direktè yo a, Rigaud Harington nan dat ki te 25 novanm 2022 a, pa twò lwen lokal la. Alòske 14 desanm 2023 a, nan yon atak moun ak zam te fè sou li toujou bò ANP la, fomatè nan lekòl polis la Montas Rigaud te sòti blese anba bal.
Paralèlman, divès zòn nan Pòtoprens tankou Channmas, zòn bò estad Sylvio Cator, ri Magloire Amboise, ba Dèlma, ak zòn sou kote yo leve anba kout bal. Sa ki fè plizyè lekòl, deja voye timoun yo lakay yo, pandan gen lòt tankou Collège Petit séminaire Saint-Martial ki poko ka louvri pòt yo akòz bal ki pa sispann tire nan anviwon yo.
Crédit Photo: Jean Ronard Saint-Juste
© Tous droits réservés – Groupe Média MAGHAITI 2024
